《何謂真普選》陳心遙
刊登於2014年10月15日《信報》副刊《視線所及》專欄
可以不喜歡講政治，但不可以講歪理。
最近看見的。
歪理一：台灣的總統馬英九不要說三道四，咁鍾意公民提名就叫黃之鋒去台灣搞囉。
答：對唔住。台灣總統大選係有公民提名嘅。門檻係上次立法院委員選舉總選民數的5%。最成功的例子係2000年。李登輝執意提名連戰參選總統，而不是當時民望極高的宋楚瑜，於是宋楚瑜退黨參選，找到幾十萬公民聯署提名，最後以些微票數敗給民進黨提名的陳水扁，得票卻比國民黨提名的連戰多出近一倍。全世界很多國家都有公民提名制度，用以抗衡政黨壟斷。
歪理二：最近睇到篇文題為「兩父子談佔中」，好多人share好似世事都看透了咁，話其實冇國際標準，美國總統、英國首相、日本首相都冇公民提名，都有篩選，都唔係一人一票選出嚟㗎。
答：呢類論調真係好多人buy，有唔少中產同讀好多書嘅人都覺得啱嗰度恐怖。首先美國總統選舉都係有公民提名，雖然最後唔係一人一票，而係選舉人票（因為要平衡各州份利益），但起碼至少係票票等值，冇特權階級。另外，如果用英國採用嘅「西敏寺制度」、「內閣制」去維護「篩選」，直頭係侮辱人哋百年的民主傳統。人哋係自由組黨、議院議員係全部直選產生㗎。
如果香港立法會議員全面一人一票直選，冇晒功能組別，多數黨黨魁做埋特首，我相信香港有識之士都唔會反對。
部分人故意將各地選舉制度講到有咁複雜得咁複雜，或者講啲唔講啲，然後語重心長咁話你知，「係咪呢？冇㗎，冇國際標準嘅普選㗎喎，係一人一票就得啦！」就等如話你聽「世界各地食嘅嘢都唔一樣㗎啦，有啲地方食飯，有啲地方食麵包、食意粉，就算同樣食意粉都有唔同整法啦，唔好俾人誤導呀，冇國際標準㗎，所以有嘢落肚就得，所以接受食屎啦。或者食住先啦」嘅道理係一樣嘅。
你可以主張國情不同，香港不適合實施民主制度，可以主張復辟帝制，或者主張中央直接委派特首以維護「國家安全」。但就唔好話依家個框架下實現嘅係真正普及而平等嘅選舉，因為真係唔係。真普選，至少係要食碳水化合物的。多謝。
Search